തിമിംഗലത്തിന്റെ വായില്‍ നിന്ന് അദ്ഭുതകരമായി രക്ഷപെട്ട് യുവാവ്

കയാക്കിങ്ങിനിറങ്ങിയ യുവാവിനെ കൂറ്റന്‍ തിമിംഗലം വിഴുങ്ങുന്ന വീഡിയോ സമൂഹ മാധ്യമങ്ങളില്‍ വൈറലാകുന്നു. തുഴഞ്ഞുവരുന്ന യുവാവിനെ, അപ്രതീക്ഷിതമായി വെള്ളത്തിന് മുകളിലേക്ക് ഉയര്‍ന്നുവരുന്ന ഹംപ്ബാക്ക് ഇനത്തില്‍പ്പെട്ട തിമിംഗിലത്തിന്‍റെ വായ്ക്കുള്ളില്‍ പെട്ടുപോവുകയായിരുന്നു. ആദ്യം കുറച്ചു നിമിഷം എന്ത് സംഭവിച്ചു എന്നറിയാതെ പകച്ചു നിന്നു പോവുകയാണ് കാഴ്ചക്കാര്‍. എന്നാല്‍ അത്ഭുതകരമെന്ന് പറയട്ടെ, ഉടന്‍ തന്നെ തിമിംഗലം യുവാവിനെ പുറത്തേക്ക് തുപ്പുകയും ചെയ്യുന്നുണ്ട്.

ചിലിയിലെ ബഹിയ എല്‍ അഗ്വിലയില്‍ 24 വയസുള്ള അഡ്രിയാന്‍ സിമാന്‍കാസ് എന്ന യുവാവ് തന്‍റെ പിതാവിനൊപ്പം കയാക്കിംഗ് നടത്തുമ്പോഴാണ് ഈ അപ്രതീക്ഷിത് സംഭവങ്ങള്‍ നിമിഷങ്ങള്‍ക്കുള്ളില്‍ നടക്കുന്നത്. ചിലിയിലെ പെറ്റാഗോണിയ മേഖലയില്‍ കഴിഞ്ഞ ശനിയാഴ്ചയായിരുന്നു സംഭവം നടന്നതെന്നാണ് വിവരം. കയാക്കില്‍ ഒപ്പമുണ്ടായിരുന്ന മറ്റൊരു യുവാവിന്‍റെ പിതാവ് വീഡിയോ ചിത്രീകരിക്കുന്നതിനിടയിലാണ് ഈ സംഭവം വീഡിയോയില്‍ പതിയുന്നത്.

സമാനമായ ഒരു സംഭവം 2020 നവംബറില്‍ കാലിഫോര്‍ണിയയിലെ ഒരു ബീച്ചിലും സംഭവിച്ചിരുന്നു. വെള്ളി മത്സ്യങ്ങളെ ഭക്ഷിക്കുന്ന തിമിംഗലങ്ങളെ കടലില്‍ നിരീക്ഷിച്ചുകൊണ്ടിരുന്ന രണ്ട് കയാക്കര്‍മാരെ ഒരു കൂറ്റന്‍ തിമിംഗലം വിഴുങ്ങുകയായിരുന്നു. എന്നാല്‍ അല്‍പ്പനേരത്തിനുള്ളില്‍ തന്നെ പരിക്കേല്‍ക്കാതെ പുറത്തുവരികയായിരുന്നു.